संयुक्त राष्ट्रका प्रवक्ताका अनुसार इजरायली सेनाले वादी गाजाको उत्तरमा बसोबास गर्ने मानिसहरूलाई २४ घण्टाभित्र क्षेत्र छोडेर दक्षिणी गाजामा सर्न भनेको छ। संयुक्त राष्ट्र संघले इजरायलको यो कदमले गाजा पट्टीमा बसोबास गर्ने कुल जनसंख्याको झण्डै आधा रहेको करिब ११ लाख मानिस प्रभावित हुने जनाएको छ। गाजा सहर पनि प्रभावित क्षेत्रमा परेको छ।
इजरायली रक्षा बल (आईडीएफ) ले गाजा र जेरुसेलमको समय अनुसार राति ११ बजे यस्तो चेतावनी दिएको हो। संयुक्त राष्ट्र संघले एक विज्ञप्ति जारी गर्दै भनेको छ, “यति ठूलो संख्यामा मानिसहरु एक ठाउँबाट अर्को ठाउँमा पुग्दा गम्भीर मानवीय संकट निस्कनेछ भन्ने संयुक्त राष्ट्रसंघको विश्वास छ।”
गत शनिबार इजरायलमा भएको हमलापछि इजरायलले गाजामा हमास लक्षित द्रुत हवाई हमला गरेको छ। गाजाको सिमानामा सैनिकहरूले ट्याङ्क, भारी गोलाबारुद र उपकरणहरू सङ्कलन गर्न थालेपछि गाजामा छिट्टै भूमिगत कारबाही गर्न सक्ने अनुमान गरिएको छ।
के भन्यो इजरायली सेनाले?
अक्टोबर १३ मा, इजरायली सेनाले गाजाका बासिन्दाहरूलाई एक बयान जारी गर्यो। सेनाले गाजामा बसोबास गर्ने मानिसहरूलाई गाजाको पूर्वी भाग छोडेर दक्षिणतर्फ जान भनेको छ।
इजरायली रक्षा बलले घोषणा गरेको छ, “आगामी दिनहरूमा सेनाले गाजा शहरमा आफ्नो कारवाही जारी राख्नेछ, साथै यसबाट नागरिकहरू प्रभावित नहोस् भनेर पनि सुनिश्चित गर्ने प्रयास गरिएको छ।”
विज्ञप्तिमा आइडिएफले यो जनताको सुरक्षाका लागि भएको बताएको छ। विज्ञप्तिमा भनिएको छ, “यो तपाइँको सुरक्षाको लागि मात्र हो। तपाइँ मानिसहरू गाजा शहरमा तब मात्र फर्कन सक्षम हुनुहुनेछ जब यसका लागि अनुमति दिँदै अर्को विज्ञप्ति जारी हुन्छ। यस बीचमा, कोही पनि इजरायलको छेउछाउको सुरक्षा घेरा तर्फ जानु हुँदैन।”
आइडिएफले हमास लडाकुहरू गाजाका निर्दोष नागरिकहरू बीच शहरमूनि राखिएका सुरुङहरूमा र आवासीय भवनहरूमा लुकेर बसेका बताएको छ। “आफ्नो र आफ्नो परिवारको सुरक्षाको लागि, गाजा शहरका नागरिकहरू, गाजाको दक्षिणतिर जानुहोस् र आफूलाई हमास आतंककारीहरूबाट टाढा राख्नुहोस्। हमास आतंककारीहरूले तपाईंलाई मानव ढालको रूपमा प्रयोग गरिरहेका छन्,” आइडिएफले भनेको छ।
इजरायली सेनाका अधिकारीहरूले गाजामा उपस्थित संयुक्त राष्ट्र संघका नेताहरूलाई यो आदेशको बारेमा पनि जानकारी दिएका छन्। जसका अनुसार, यसमा उत्तरी गाजामा रहेका सबै संयुक्त राष्ट्रका आधारहरू, संयुक्त राष्ट्रका कर्मचारीहरू, स्कूलहरू, अस्पतालहरू र क्लिनिकहरू जस्ता संयुक्त राष्ट्र सेवाहरू समावेश छन् र ति क्षेत्र खाली गर्न भनिएको छ।
यस विषयमा शुक्रबार संयुक्त राष्ट्रसंघीय सुरक्षा परिषद्को महत्वपूर्ण बैठक बस्दैछ। बैठकमा सुरक्षा परिषद्का सबै सदस्य अमेरिका, बेलायत, रुस, चीन र फ्रान्स सहभागी हुने अपेक्षा गरिएको छ।
संयुक्त राष्ट्रसंघद्वारा इजरायलको कदमको आलोचना
संयुक्त राष्ट्रसंघले इजरायली सेनाको यो भनाइको आलोचना गर्दै यो आदेश तत्काल फिर्ता लिनुपर्ने बताएको छ। यसले दुखद स्थिति निम्त्याउने र गम्भीर मानवीय परिणाम निम्त्याउने उसले जनाएको छ।
सञ्चारमाध्यममा जारी विज्ञप्तिमा संयुक्त राष्ट्र संघले भनेको छ, “यदि यस्तो आदेश दिइएको छ भने यसलाई तुरुन्त फिर्ता लिन संयुक्त राष्ट्रसङ्घले अपील गर्दछ। यो कदमले हालको त्रासदीलाई झनै नराम्रो बनाउनेछ।”
संयुक्त राष्ट्रका प्रवक्ता स्टेफेन डुजारिकले भने, “गाजामा रहेको संयुक्त राष्ट्रका अधिकारीहरूलाई इजरायली सेनाको सम्पर्क विभागका अधिकारीहरूले – गाजाको उत्तरमा रहेको वादी गाजामा रहेका सम्पूर्ण जनसंख्यालाई आगामी २४ घण्टाभित्र दक्षिणी गाजातर्फ जान भनेको छ।”
गाजाको जनसंख्या लगभग २३ लाख छ र यो आदेशको अर्थ हो कि लगभग ११ लाख मानिसहरू उत्तरबाट दक्षिणतिर सर्नेछन्। गाजा शहर पनि वादी गाजामा छ, जुन घना जनसंख्या भएको छ। यो गाजाको सबैभन्दा ठूलो शहर हो।
इजरायली राजदूतले राष्ट्रसंघको प्रतिक्रियालाई भने ‘लज्जास्पद’
संयुक्त राष्ट्रका लागि इजरायलका राजदूत गिलाड अर्दानले भने, “गाजाका बासिन्दाहरूलाई इजरायलको चेतावनीप्रति संयुक्त राष्ट्रले दिएको प्रतिक्रिया लज्जास्पद छ।” समाचार एजेन्सी रोयटर्सका अनुसार उनले संयुक्त राष्ट्रसंघले हमासको कडा निन्दा गर्ने र आफ्नो रक्षाका लागि इजरायलको प्रयासलाई समर्थन गर्ने कुरामा ध्यान केन्द्रित गर्नुपर्ने बताए।
उनले इजरायलले समयमै गाजाका जनतालाई चेतावनी दिएको बताए। किनभने यो सैन्य अभियानमा नागरिकहरूलाई हानि पुर्याउन आफूहरुले नचाहेको उनले बताए।
अर्दानले भने, “हमासले धेरै वर्षदेखि हतियार जम्मा गरिरहेको छ र वर्षौंदेखि संयुक्त राष्ट्र संघले यसलाई बेवास्ता गरेको छ। हमासले हतियार र हत्या लुकाउन नागरिक र नागरिक भवनहरू र गाजा पट्टीको प्रयोग गरिरहेको छ।”
“इजरायलको साथमा उभिनुको सट्टा, जसले सयौं निर्दोष मानिसहरूलाई मारेको छ उसलाई संयुक्त राष्ट्रसंघले साथ दिइरहेको छ। संयुक्त राष्ट्रसंघले बन्धकहरूलाई मुक्त गर्न, हमासको आलोचना गर्न र इजरायलको आफ्नो रक्षा गर्ने अधिकारलाई समर्थन गर्न ध्यान केन्द्रित गर्नुपर्छ”, उनले अगाडि भने।
