काठमाडौं – कप्तान देव खनालको शतक सहयोगमा नेपालले यू-१९ प्रिमियर कपमा इरानमाथि २ सय ७४ रनको सानदार जित हात पारेको छ। जितका लागि ३ सय ५४ रनको विशाल विजयी लक्ष्य पछ्याएको इरान ३०.५ ओभरमा ७९ रनमा अल आउट भयो।
इरानका ओपनर आमेर खोर्सन्दले ३७ रन बनाए पनि अरुले खुलेर खेल्न सकेनन्। इरानका ९ खेलाडीले दोहोरो अंकमा रन बनाउन सकेनन्।
नेपालका दीपेश कँडेल र सुवास भण्डारीले समान ३/३ विकेट लिए। हेमन्त धामी र आकाश चन्दले २/२ विकेट लिए ।
त्यसअघि मलेसियाको वाइएसडी युकेएम ओभल बाँगीमा टस हारेर पहिला ब्याटिङको निम्तो पाएको नेपाल ४०.१ ओभरमा ३ सय ५३ रनमा अल आउट भएको थियो। नेपालको जितमा कप्तान खनालले ६० बलमा १२ चौका र ४ छक्कासहित १ सय रनको शतकीय इनिङ खेलेका थिए। देव नेपालबाट यू१९ मा दुई शतक हान्ने पहिलो खेलाडी हुन्। उनले गत फागुमा आइसिसी यू-१९ विश्वकप एसिया क्षेत्र छनोटमा कुवेतविरुद्ध १ सय २५ रनको शतकीय इनिङ खेलेका थिए।
दीपक बोहराले ६५ रन बनाए। तेस्रो विकेटका लागि देव र दीपकले १६६ रनको साझेदारी गरेका थिए। दीपक डुम्रेले ६९ रन बनाए। दीपेश कंडेलले २९ रन बनाए।
इरानका दद्रहमान राइसी र सलमन निज्मान्दले समान३/३ विकेट लिए ।
नेपालले अर्को खेल असोज २८ गते बहराइनसँग खेल्नेछ।
