नेपाल क्रिकेट संघ (क्यान) ले दक्षिण अफ्रिकामा यसै महिना हुने आइसीसी यु-१९ विश्वकपका लागि १५ सदस्यीय टोलीको घोषणा भएको छ।
क्यानले एसिसी एसिया कप खेलेको १४ सदस्यीय टोलीमा एक परिवर्तन र एक खेलाडी थप गर्दै टोली घोषणा गरेको हो।
एसिया कप खेलेको टोलीमा रहेका तीब्र गतिका बलर हेमन्त धामी चोटका कारण यसपटक टोलीमा छैनन्। उनको स्थान अर्का तीब्र बलर दुर्गेश गुप्ताले लिनेछन्। यस्तै अलराउन्डर दीपक बोहोरा पनि टोलीमा थपिएका छन्।
जनवरी १९ देखि फेब्रुअरी ११ सम्म हुने विश्वकपमा नेपाल समूह ‘डी’ मा रहेको छ। नेपालको समूहमा न्यूजिल्याण्ड, पाकिस्तान र अफगानिस्तान छन्।
नेपालले पहिलो खेल जनवरी २१ मा न्यूजिल्याण्डविरुद्ध खेल्ने छ। यस्तै दोस्रो खेल जनवरी २४ मा पाकिस्तानसँग र समूहको अन्तिम खेल अफगानिस्तानविरुद्ध जनवरी २६ मा खेल्नेछ।
त्यसअघि नेपालले जनवरी १३ मा स्कटल्याण्ड र जनवरी १६ मा वेस्टइन्डिजविरुद्ध वार्मअप खेल खेल्नेछ।
