अर्जेन्टिनी सुपरस्टार लियोनेल मेस्सीले आठौं पटक विश्वकै प्रतिष्ठित बालोन डि’ओर अवार्ड जितेका छन् ।
फ्रान्स फुटबल म्यागजिनले हरेक वर्ष विश्वको उत्कृष्ट खेलाडीलाई दिने यो अवार्ड जितेका हुन् । यो मेस्सीको आठौं बालोन डि’ओर हो । यसअगाडि सन् २००९ देखि लगातार २०१०, २०११, २०१२ सम्म तथा २०१५, २०१९ र २०२१ मा यो अवार्ड हात पारेका थिए।
मेस्सीले म्यानचेस्टर सिटी र नर्वेका खेलाडी एर्लिङ हालान्डलाई पछि पार्दै सो अवार्ड जितेका हुन् ।अन्तिम मतदानमा हाल्यान्ड दोस्रो, एमबापे तेस्रो तथा केभिन डे ब्रुएना चौथोमा रहे ।
गत डिसेम्बरमा कतारमा भएको विश्वकपको उपाधि जिताउन आफ्नो देशको नेतृत्व गरेका उनले आफ्नो जीवनको महत्वाकांक्षा पूरा गर्दै बालोन डि’ओर समेत जित्न सफल भएका हुन् ।
उनले विश्वकप यात्रामा सात गोल गर्दै उत्कृष्ट खेलाडी उपाधि समेत हात पारेका थिए । १६औं पटक मनोनयनमा परेका मेस्सीले बालोन डि ओर अवधि भरि ३८ गोल र २५ असिस्ट गरेका थिए ।
‘फेरि एकपल्ट यो अवार्ड जितेकोमा खुसी छु। विश्वकप जितेसँगै हामीले त्यो सपनालाई पूरा गरेका थियौं,’ उनले भने, ‘मैले फुटबल खेलेर यस्तो उपलब्धी हात पार्न सक्ने थिएँ भनेर कहिले पनि कल्पना गरेका थिइन । म भाग्यमानी रहें, किनभने मैले खेलेको टिम बलियो रह्यो ।’
यस्तै महिला तर्फको बालोन डि’ ओर स्पेन र बार्सिलोनाकी खेलाडी आईटाना बोनमाटीले जितेको छिन् । बोनमाटीले यसै वर्ष अष्ट्रेलियामा भएको विश्वकप जितेकी थिइन्।
यसका साथै बाट सिजनको लालिगा र च्याम्पियन्स लिग जितेको बार्सिलोनाको टोलीमा उनको महत्वपूर्ण भूमिका रहेको थियो । बोनमाटीले युइएफए उत्कृष्ट वर्ष महिला खेलाडीको उपाधि समेत जितिसकेककी थिइन्।
