दक्षिण अफ्रिकाले आइसिसी विश्वकप २०२३ मा पाकिस्तानमाथि एक विकेटको रोमान्चक जित हात पार्दै शीर्षस्थानमा उक्लिएको छ । यो जितसँगै दक्षिण अफ्रिकाले घरेलु टोली भारतलाई पछि पार्दै अंक तालिकामा शीर्षस्थानमा उक्लिएको छ ।
जितको लागि २ सय ७१ रनको विजयी लक्ष्य पछ्याएको दक्षिण अफ्रिका ४७.२ ओभरमा ९ विकेट गुमाउँदै पूरा गर्यो । दक्षिण अफ्रिकाको जितमा मध्यक्रमका ब्याटर एडेन माक्ररमले ९३ बलमा ७ चौका र ३ छक्कासहित सर्वाधिक ९१ रनको योगदान दिए । स्पिनर उस्मा मिरको ४१ औं ओभरको दोस्रो बलमा माक्ररम बाबर आजमबाट क्याच आउट भएपछि शतक बनाउन चुकेका थिए ।
२७१ रनको लक्ष्य पछ्याएको दक्षिण अफ्रिकाको सुरुआत भने राम्रो भएन । टिमको स्कोर ३४ रन भएका बेला क्विन्टन डी कक १४ बलमा २४ रन बनाएर आउट भए । टिमको स्कोर ९.५ ओभरमा ६७ रन हुँदा टेम्बा बामुभा पभेलिनय फर्किए । उनले जम्मा २८ रन बनाए। मिलर ३३ बलमा २९ रनको पारि खेल्दै आउट भए ।
अन्तिममा केशव महाराज र तबरेज सम्सीले ११ रनको साझेदारी गर्दै कठिन तथा रोमाञ्चक जित दिलाए । महाराज ७ तथा सम्बी ४ रनमा नटआउट रहे ।
पाकिस्तानका सहिन साह अफ्रिदीले ३ विकेट लिँदा, ह्यारिस रौफ, मोहम्मद वसिम र उस्मामिरले दुई-दुई विकेट लिए ।
त्यसअघि चेन्नईमा टस जितेर पहिला ब्याटिङ रोजेको पाकिस्तान ४६.४ ओभरमा २ सय ७० रनमा अल आउट भएको थियो । पाकिस्तानका मध्यक्रमका ब्याटर साउद सकिलले ५२ बलमा ७ चौकासहित सर्वाधिक ५२ रन बनाएका थिए ।
कप्तान बाबर आजमले ६५ बलमा ४ चौका र १ छक्कासहित ५०, ओपनर अब्दुल्लाह शफिक ९, इमाम उल हक १२, मोहम्मद नवाज २४, शाहिन शाह अफ्रिदी २, मोहम्मद वासिम जुनियर ७ र मोहम्मद रिजवान ३१ रनमा आउट भए ।
शादब खान ३६ बलमा ३ चौका र २ छक्कासहित ४३ र इफ्तिखार अहमद २१ रनमा आउट भए । अफ्रिकाकाको लागि स्पिनर तबरेज शाम्सीले १० ओभरमा ६० रन खर्चेर ४ विकेट लिए । मार्को यानसनले ९ ओभरमा १ मेडनसहित ४३ रन खर्चेर ३ विकेट लिए । जेराल्ड कोट्जी ७ ओभरमा ४२ रन खर्चेर २ विकेट लिए ।
पाकिस्तानको यस हारले अष्ट्रेलियालाई भने फाइदा पुग्नेछ । अष्ट्रेलियाले बाँकी सबै खेल जितेको खण्डमा सहजै सेमिफाइनलमा स्थान बनाउनेछ । चार मध्ये एक खेल हार्दा पनि अष्ट्रेलिया १२ अंकका साथ सेमिफाइनल खेल्न सक्छ ।
पाकिस्तानको भने सेमिफाइनल सम्भावना अब अंक गणीतीय झिनो मात्रै बाँकी छ । पाकिस्तान ६ खेलमा २ मा जित र ४ मा हारसहित छैटौं स्थानमा छ । पाकिस्तानले लगातार चार खेल हारेको हो । पाकिस्तानले अव ३१ अक्टोबरमा बंगलादेश, ४ नोभेम्बरमा न्युजिल्यान्ड र ११ नोभेम्बरमा इंग्ल्यान्डसँग खेल्नेछ ।
